ಮೈಸೂರು: ವ್ಯಾಕ್ಸಿನ್‌ಗಷ್ಟೇ ಏಕೆ, ಕೋವಿಡ್‌ನಿಂದ ಮೃತಪಟ್ಟವರ ಮರಣ ಪ್ರಮಾಣ ಪತ್ರಗಳಲ್ಲೂ ಪ್ರಧಾನಿ ನರೇಂದ್ರ ಮೋದಿ ಅವರ ಫೋಟೋ ಹಾಕಿಸಿಕೊಳ್ಳಲಿ ಎಂದು ಕಾಂಗ್ರೆಸ್‌ ವಕ್ತಾರ ಎಂ.ಲಕ್ಷ್ಮಣ್‌ ವ್ಯಂಗ್ಯವಾಡಿದ್ದಾರೆ.
ಗುರುವಾರ ನಗರದ ಕಾಂಗ್ರೆಸ್‌ ಕಚೇರಿಯಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಕೋವಿಡ್‌ ಲಸಿಕೆ ಪಡೆದವರಿಗೆ ನೀಡುವ ಪ್ರಮಾಣ ಪತ್ರದಲ್ಲಿ ಪ್ರಧಾನಿ ಮೋದಿ ಅವರ ಫೋಟೋ ಇರುತ್ತದೆ. ಇದು ಪ್ರಚಾರದ ಗಿಮಿಕ್. ಅದರಂತೆ ಕೋವಿಡ್‌ನಿಂದ ಮೃತಪಟ್ಟವರ ಮರಣ ಪ್ರಮಾಣ ಪತ್ರಗಳಲ್ಲೂ ಅವರ ಫೋಟೋ ಹಾಕಿಸಿಕೊಳ್ಳಲಿ. ಏಕೆಂದರೆ ದೇಶದಲ್ಲಿ ಈ ಪ್ರಮಾಣದ ಸಾವುಗಳಿಗೆ ಮೋದಿ ಅವರೇ ಕಾರಣ ಅಲ್ಲವೇ ಎಂದು ಕುಟುಕಿದರು.
ಕೋವಿಡ್‌ ಸಾವು ವರದಿಗಳಲ್ಲೂ ರಾಜ್ಯ ಹಾಗೂ ಕೇಂದ್ರ ಸರ್ಕಾರಗಳು ತಪ್ಪು ಲೆಕ್ಕ ನೀಡುತ್ತಿವೆ. ಲಕ್ಷಾಂತರ ಮಂದಿ ಕೋವಿಡ್‌ನಿಂದ ಮೃತಪಟ್ಟರೆ, ಇವರು ಕೇವಲ ಸಾವಿರ ಸಂಖ್ಯೆಯಲ್ಲಷ್ಟೇ ಸುಳ್ಳು ಲೆಕ್ಕ ನೀಡುತ್ತಿದ್ದಾರೆ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.
ಸಿಆರ್‌ಎಸ್‌ ಪ್ರಕಾರ 2020ರ ಏಪ್ರಿಲ್‌ ತಿಂಗಳಿಂದ 2021ರ ಮೇ ತಿಂಗಳವರೆಗೆ 1.60 ಲಕ್ಷ ಮಂದಿ ಸಾವಿಗೀಡಾಗಿದ್ದರೆ, ಸರ್ಕಾರದವರು ಕೇವಲ 30 ಸಾವಿರ ಎಂದು ಲೆಕ್ಕ ನೀಡಿದ್ದಾರೆ. ಅಲ್ಲದೇ, ಮೈಸೂರಿನಲ್ಲಿ ಹಳೇ ಸಾವು ಪ್ರಕರಣಗಳನ್ನು ಹೊಸ ಪ್ರಕರಣಗಳ ಜೊತೆಯಲ್ಲಿ ಸೇರಿಸಿ ವರದಿ ನೀಡುತ್ತಿದ್ದಾರೆ ಎಂದು ಗಂಭೀರ ಆರೋಪ ಮಾಡಿದರು.
ವಿವಿಧ ಅಭಿವೃದ್ಧಿ ಯೋಜನೆಗಳಿಗಾಗಿ ಮುಡಾಗೆ 422 ಕೋಟಿ ರೂ. ಅನುದಾನ ಮಂಜೂರಾಗಿದೆ. ಈ ಅನುದಾನದ ಸಮರ್ಪಕ ಬಳಕೆಯಾಗಬೇಕು. ಅದಕ್ಕಾಗಿ ತಜ್ಞರ ಸಮಿತಿಯೊಂದನ್ನು ರಚಿಸಿ, ಚರ್ಚಿಸಲಿ ಎಂದು ಸಲಹೆ ನೀಡಿದರು.
