ವಿಜಯಪಥ ಸಮಗ್ರ ಸುದ್ದಿ
ತಿ.ನರಸೀಪುರ: ವಿಶ್ವದ ಜ್ಞಾನದ ಸಂಕೇತವಾಗಿ ಸಂವಿಧಾನ ಶಿಲ್ಪಿ ಡಾ.ಬಿ.ಆರ್.ಅಂಬೇಡ್ಕರ್ ಅವರು ಜಾಗತಿಕ ಮಟ್ಟದಲ್ಲಿ ಮುನ್ನೆಲೆಗೆ ಬರಲು ಬಹುಜನ ಸಮಾಜ ಪಕ್ಷದ ಸಂಸ್ಥಾಪಕ ಕಾನ್ಸಿರಾಮ್ ಅವರ ಪರಿಶ್ರಮ ಕಾರಣವೆಂದು ಜಿಲ್ಲಾಧ್ಯಕ್ಷ ಬಿ.ಆರ್.ಪುಟ್ಟಸ್ವಾಮಿ ಹೇಳಿದರು.
ಪಟ್ಟಣದ ತಾಲೂಕು ಕಚೇರಿ ಆವರಣದಲ್ಲಿರುವ ಉದ್ಯಾನವನದಲ್ಲಿ ಬುಧವಾರ ಡಾ.ಬಿ.ಆರ್.ಅಂಬೇಡ್ಕರ್ ಅವರ 130ನೇ ಜಯಂತಿ ಪ್ರಯುಕ್ತ ಪುತ್ಥಳಿಗೆ ಕಾರ್ಯಕರ್ತರು ಹಾಗೂ ಮುಖಂಡರೊಂದಿಗೆ ಮಾಲಾರ್ಪಣೆ ಮಾಡಿ ಮಾತನಾಡಿದರು. ಬಾಬಾ ಸಾಹೇಬ್ ಅಂಬೇಡ್ಕರ್ ಶೋಷಿತರು ಸೇರಿದಂತೆ ದಲಿತರು ಹಾಗೂ ಹಿಂದುಳಿದ ಜನರ ನಾಯಕರಷ್ಟೇ ಎಂಬುವಂತೆ ಬಿಂಬಿಸುವ ಕಾಲಘಟ್ಟದಲ್ಲಿ ಕಾನ್ಸಿರಾಮ್ ಅವರು ಅಂಬೇಡ್ಕರ್ ಭಾವಚಿತ್ರದೊಂದಿಗೆ ರಾಜಕಾರಣವನ್ನು ಆರಂಭಿಸಿ ದೇಶದಾದ್ಯಂತ ಸಂಚಲನವನ್ನು ಸೃಷ್ಟಿಸಿದರು ಎಂದರು.
ದೇಶವನ್ನು ಸತತವಾಗಿ ಆಳ್ವಿಕೆ ಮಾಡಿದಂತಹ ಮೋದಿ ಸರ್ಕಾರಗಳು ಭಾರತದ ಚರಿತ್ರೆಯಿಂದ ಅಂಬೇಡ್ಕರ್ ಅವರನ್ನು ಮರೆಮಾಚುವ ಪ್ರಯತ್ನವನ್ನು ನಿರಂತರವಾಗಿ ಮಾಡಿದ್ದರು. ಬದುಕಿದ್ದ ಸಂದರ್ಭದಲ್ಲಿಯೇ ರಾಜಕೀಯ ಹಿನ್ನಡೆಯನ್ನು ಅನುಭವಿಸಿದ ಅಂಬೇಡ್ಕರವರ ಭಾವಚಿತ್ರದೊಂದಿಗೆ ಕಾನ್ಶಿರಾಮ್ ಬಹುಜನ ಸಮಾಜ ಪಕ್ಷ ವನ್ನು ಕಟ್ಟಲು ಆರಂಭಿಸಿದ ನಂತರ ಮನುವಾದಿ ಪಕ್ಷಗಳೆಲ್ಲವೂ ಅಂಬೇಡ್ಕರ್ ಹೆಸರನ್ನು ರಾಜಕೀಯವಾಗಿ ಬಳಸಿಕೊಳ್ಳಲು ಆರಂಭಿಸಿದವು.
ದೇಶದಾದ್ಯಂತ 21ನೇ ಶತಮಾನದ ವೇಳೆಗೆ ಅಂಬೇಡ್ಕರ್ ಅವರು ಚಾಲ್ತಿಗೆ ಬಂದ ಹಿನ್ನೆಲೆಯಲ್ಲಿ ಜಾಗತಿಕ ಮಟ್ಟದಲ್ಲಿ ಅಂಬೇಡ್ಕರ್ ಎಲ್ಲರ ಗಮನವನ್ನು ಸೆಳೆದರು. ದೇಶದಲ್ಲಷ್ಟೇ ಅಲ್ಲ ವಿದೇಶಗಳಲ್ಲೂ ಕೂಡ ಅಂಬೇಡ್ಕರ್ ಅವರ ಜಯಂತಿ ಆಚರಣೆಯಾಗುತ್ತಿದೆ.
ಕಳೆದ ವರ್ಷ ವಿಶ್ವಸಂಸ್ಥೆ ಜಯಂತಿ ದಿನವನ್ನು ವಿಶ್ವ ಜ್ಞಾನದ ದಿನ ಎಂದು ಘೋಷಣೆ ಮಾಡಿದರೆ, ಈ ವರ್ಷ ಕೆನಡಾ ದೇಶ ಸಮಾನತೆಯ ದಿನ ಎಂದು ಘೋಷಣೆ ಮಾಡಿರುವುದು ಸಮಸ್ತ ಭಾರತೀಯರ ಹೆಮ್ಮೆಯಾಗಿದೆ ಎಂದು ಪುಟ್ಟಸ್ವಾಮಿ ಹರ್ಷ ವ್ಯಕ್ತಪಡಿಸಿದರು.
ಬಿಎಸ್ಪಿ ಜಿಲ್ಲಾ ಕಾರ್ಯದರ್ಶಿ ಬಿ.ಮಹದೇವಸ್ವಾಮಿ, ಕ್ಷೇತ್ರಾಧ್ಯಕ್ಷ ಕುಕ್ಕೂರು ಪುಟ್ಟಣ್ಣ, ಪ್ರಧಾನ ಕಾರ್ಯದರ್ಶಿ ಪುಟ್ಟಮರುಡಯ್ಯ, ಕ್ಷೇತ್ರ ಉಸ್ತುವಾರಿ ಕೈಯಂಬಳ್ಳಿ ಪುಟ್ಟಸ್ವಾಮಿ, ಖಜಾಂಚಿ ಅಂಕನಹಳ್ಳಿ ಪುಟ್ಟರಾಜು, ಕಾರ್ಯದರ್ಶಿ ಮಹೇಂದ್ರ ಕುಮಾರ, ಸಂಯೋಜಕ ಆದಿಬೆಟ್ಟಹಳ್ಳಿ ಕುಮಾರ, ಗ್ರಾಪಂ ಸದಸ್ಯ ಶಿವಸ್ವಾಮಿ(ಗೋವಿಂದ), ಮಾಜಿ ಸದಸ್ಯ ಪುಟ್ಟಸ್ವಾಮಿ, ಮುಖಂಡರಾದ ಚಿನ್ನಸ್ವಾಮಿ, ಮಂಟೇಸ್ವಾಮಿ, ಹೊಸಪುರ ಲಿಂಗರಾಜು, ನಟರಾಜು, ಶಿವಮೂರ್ತಿ, ನಂಜುಂಡಸ್ವಾಮಿ, ಲಿಂಗರಾಜು ಇದ್ದರು.
