ವಿಜಯಪಥ ಸಮಗ್ರ ಸುದ್ದಿ
ಮೈಸೂರು: ಲಿವಿಂಗ್ ಟು ಗೆದರ್‌ನಲ್ಲಿದ್ದು, ಮಗು ಮಾಡಿಕೊಂಡಿಕೊಂಡಿದ್ದ 21 ವರ್ಷದ ಹುಡುಗ, ಹುಡುಗಿಗೆ ಈಗ ಮಗು ಬೇಡವಾಗಿದ್ದು, ನಿರ್ದಯಿಗಳಾಗಿ ಮಗುವನ್ನು (ಈಗ ಮಗುವಿಗೆ 25 ದಿನ) ಎಸೆಯಲು ಮುಂದಾಗಿದ್ದರು. ಆ ಮಗು ಈಗ ಕೊಳ್ಳೇಗಾಲದ ಜೀವನಜ್ಯೋತಿ ಟ್ರಸ್ಟ್‌ನಲ್ಲಿ ಆಶ್ರಯ ಪಡೆದಿದೆ.
ಇಂತಹ ಅಮಾನವೀಯ ಘಟನೆಯೊಂದು ಅರಮನೆಗಳ ನಗರಿ ಮೈಸೂರಿನಲ್ಲಿಯೇ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ. ಕೊರೊನಾ ಸಂಕಷ್ಟ ಕಾಲದಲ್ಲಿ ಕನಿಷ್ಠ ಮಾನವೀಯತೆಯೂ ಇಲ್ಲದೆ, ಈ ಜೋಡಿ ಮಗುವನ್ನು ಎಸೆಯಲು ಮುಂದಾಗಿದ್ದರು. ಸದ್ಯ ಪ್ರಕರಣ ಪೊಲೀಸ್ ಠಾಣೆ ಮೆಟ್ಟಿಲೇರಿದೆ.
21 ವರ್ಷದ ಯುವಕ ಮತ್ತು ಯುವತಿ ಕಾಲೇಜಿನಲ್ಲಿ ಸಹಪಾಠಿಗಳಾಗಿದ್ದರು. ಇಬ್ಬರ ಮನೆಯವರೂ ಆರ್ಥಿಕವಾಗಿ ಸ್ಥಿತಿವಂತರೇ. ಕಾಲೇಜು ದಿನಗಳಲ್ಲಿ ಇಬ್ಬರೂ ಸ್ನೇಹಿತರಾಗಿದ್ದು, ನಂತರ ಪ್ರೀತಿಸಿ ಜತೆಗೆ ಸುತ್ತಾಡಿದ್ದಾರೆ. ಒಂದಷ್ಟು ದಿನ ಒಂದೇ ಮನೆಯಲ್ಲಿ ಒಟ್ಟಿಗೆ ಇದ್ದಿದ್ದಾರೆ. ಈ ಪರಿಣಾಮ ಅವರಿಗೆ ಗಂಡು ಮಗು ಜನಿಸಿದೆ. ಆದರೆ, ಆ ನಂತರ ಇಬ್ಬರಿಗೂ ಮಗು ಬೇಡವಾಗಿದೆ.
ಇದರಿಂದ ಅವರು 12 ದಿನಗಳ ಹಸುಗೂಸನ್ನು ಎಸೆಯಲು ಮುಂದಾದರು. ಇದನ್ನು ತಿಳಿದ ಪರಿಚಯದವರು ಮಗುವನ್ನು ಎಸೆಯಬೇಡಿ, ನಾವು ಸಾಕುತ್ತೇವೆ ಎಂದು ಪಡೆದಿದ್ದಾರೆ. ಈ ಘಟನೆಯಾದ ನಾಲ್ಕೈದು ದಿನಗಳ ಬಳಿಕ ಈ ವಿಷಯ ಮಕ್ಕಳ ಕಲ್ಯಾಣ ಸಮಿತಿಗೆ ಗೊತ್ತಾಗಿದೆ. ತಕ್ಷಣ ಮಧ್ಯ ಪ್ರವೇಶಿಸಿದ ಸಮಿತಿಯ ಸದಸ್ಯರು ಕಾನೂನಿನ ಅನುಮತಿಯಿಲ್ಲದೆ, ಹೀಗೆ ಮಗುವನ್ನು ಇಟ್ಟುಕೊಳ್ಳುವುದು ತಪ್ಪು ಎಂದು ಹೇಳಿ ನಗರದ ಪೊಲೀಸ್ ಠಾಣೆಯೊಂದಕ್ಕೆ ಹೆತ್ತವರನ್ನು ಕರೆಸಿ ವಿಚಾರಣೆ ಮಾಡಿದಾಗ ಇಬ್ಬರೂ ಮಗು ಬೇಡ ಎಂದಿದ್ದಾರೆ.
ಠಾಣೆಯಲ್ಲಿ ಪೊಲೀಸರು ಮತ್ತು ಮಕ್ಕಳ ಕಲ್ಯಾಣ ಸಮಿತಿ ಸದಸ್ಯರು ಕಾನೂನಿನ ಪ್ರಕಾರ ಇಬ್ಬರಿಗೂ ಮದುವೆಯ ವಯಸ್ಸು ಆಗಿದ್ದು, ಮದುವೆ ಮಾಡಿಕೊಂಡು ಮಗು ಸಾಕುವಂತೆ ಸಲಹೆ ನೀಡಿದ್ದಾರೆ. ಆದರೆ, ಇಬ್ಬರೂ ಕೂಡ ತಮ್ಮ ತಮ್ಮ ಮನೆಗಳಲ್ಲಿ ಒಪ್ಪುವುದಿಲ್ಲ. ನಮಗೆ ಮದುವೆಯಾಗಲೂ ಇಷ್ಟವಿಲ್ಲ ಎಂದು ಹೇಳಿ ಮದುವೆಯಾಗಿ ಮಗು ಸಾಕಲು ನಿರಾಕರಿಸಿದ್ದಾರೆ. ಈ ವಿಷಯ ಎರಡೂ ಮನೆಯವರಿಗೂ ತಿಳಿದಿದೆ. ಆದರೆ, ಅವರೂ ಹೆಚ್ಚು ತಲೆ ಕೆಡಿಸಿಕೊಂಡಿಲ್ಲ.
ಅಂತಿಮವಾಗಿ ಮೇ 19ರಂದು ಮಗುವನ್ನು ವಶಕ್ಕೆ ಪಡೆದ ಮಕ್ಕಳ ಕಲ್ಯಾಣ ಸಮಿತಿ ಮಗುವನ್ನು ಕೊಳ್ಳೇಗಾಲದ ಜೀವನಜ್ಯೋತಿ ಟ್ರಸ್ಟ್‌ನ ದತ್ತು ಕೇಂದ್ರದಲ್ಲಿ ಆರೈಕೆ ಮಾಡಲಾಗುತ್ತಿದೆ. ಮನಸ್ಸು ಬದಲಾಯಿಸಿಕೊಂಡು ಮಗುವನ್ನು ವಾಪಸ್‌ ಪಡೆಯಲು ಹೆತ್ತವರಿಗೆ 60 ದಿನಗಳ ಅವಕಾಶವಿದೆ. ಮಗು ಹಸ್ತಾಂತರದ ವೇಳೆ ಎಸ್‌ಜೆಪಿಯು ಪ್ರಸ್ನನಕುಮಾರ್, ಜಿಲ್ಲಾ ಮಕ್ಕಳ ರಕ್ಷಣಾ ಘಟಕ ದಿವಾಕರ್, ಅಪೇಕ್ಷಿತಾ, ಶ್ರುತಿ, ಮಕ್ಕಳ ಕಲ್ಯಾಣ ಸಮಿತಿ ಈ.ಧನಂಜಯ ಎಲಿಯೂರು ಇದ್ದರು.
ಬಹುತೇಕರ ವಿರೋಧದ ನಡುವೆಯೂ ಮದುವೆಯಾಗದೆ ಕಾನೂನು ನಿಗದಿಪಡಿಸಿರುವ ನಿರ್ದಿಷ್ಟ ವಯಸ್ಸಿನ (ಮೇಜರ್) ಗಂಡು ಮತ್ತು ಹೆಣ್ಣು ಲಿವಿಂಗ್ ಟುಗೆದರ್‌ನಲ್ಲಿ ಇರಲು ಮತ್ತು ಮದುವೆಯಾಗದೆ ಮಗು ಪಡೆಯಲು ಕಾನೂನಿನ ಅಡಿಯಲ್ಲಿ ಅವಕಾಶವಿದೆ. ಆದರೆ, ಇಂತಹ ಅವಕಾಶಗಳಿಂದ ಕಂದಮ್ಮಗಳು ಅನಾಥವಾಗುತ್ತಿವೆ. ಅದಕ್ಕೆ ಇದೊಂದು ಪ್ರಕರಣ ಸಾಕ್ಷಿಯಂತಿದೆ.
