ಬೆಂಗಳೂರು: ವೇತನ ಆಯೋಗ ಮಾದರಿಯಲ್ಲಿ ಸರಿ ಸಮಾನ ವೇತನ ಕೊಡುವ ಭರವಸೆ ನೀಡಿದ ಸರ್ಕಾರ ಅದನ್ನು ಜಾರಿ ಗೊಳಿಸಬೇಕು ಎಂದು ಆಗ್ರಹಿಸಿ ಸಾರಿಗೆ ನೌಕರರ ಸಮಾನ ಮನಸ್ಕರ ವೇದಿಕೆ ಹಮ್ಮಿಕೊಂಡಿರುವ ಅನಿರ್ದಿಷ್ಟಾವಧಿ ಧರಣಿ ಸತ್ಯಾಗ್ರಹ ಇಂದಿಗೆ (ಮಾ.3) ಮೂರನೇ ದಿನಕ್ಕೆ ಕಾಲಿಟ್ಟಿದೆ.
ಈ ನಡುವೆ ಎರಡನೇ ದಿನದ ಧರಣಿ ಪೂರ್ಣಗೊಂಡ ಬಳಿಕ ಧರಣಿ ಸ್ಥಳದಲ್ಲೇ ಊಟ ಮಾಡಿ ರಾತ್ರಿ ಪೂರ ಸೊಳ್ಳೆ ಪರದೆ ಮತ್ತು ಹೊದಿಕೆಯನ್ನು ಹೊದ್ದುಕೊಂಡು ನೌಕರರು ಹಿಡಿ ರಾತ್ರಿಯನ್ನು ಓಪನ್‌ ಸ್ಥಳದಲ್ಲಿ ಗಾಳಿ ಚಳಿಯ ನಡುವೆಯೇ ಕಳೆದರು.
ಇನ್ನು ಇಂದು ಧರಣಿಯನ್ನು ಬೇರೆ ರೂಪಕ್ಕೆ ತೆಗೆದುಕೊಂಡು ಹೋಗುವ ಸಲುವಾಗಿ ವೇದಿಕೆ ಪದಾಧಿಕಾರಿಗಳ ತುರ್ತು ಸಭೆ ಕರೆದು ಚರ್ಚೆ ನಡೆಸಲು ಮುಂದಾಗಿದೆ. ಈ ಸಭೆಯ ಬಳಿಕ ಏನು ಕ್ರಮ ತೆಗೆದಕೊಳ್ಳಲಾಗಿದೆ ಎಂಬುದರ ಬಗ್ಗೆ ಸ್ಪಷ್ಟತೆ ಸಿಗಲಿದೆ.
ಈ ನಡುವೆ ಮಾ.2ರಂದು ನೂರಾರು ಮಂದಿ ನೌಕರರು ರಾಜ್ಯದ ವಿವಿಧ ಜಿಲ್ಲೆ, ತಾಲೂಕುಗಳಿಂದ ಆಗಮಿಸಿ ಧರಣಿಯನ್ನು ಬೆಂಬಲಿಸಿದ್ದಾರೆ. ಇದಿಷ್ಟೇ ಅಲ್ಲದೆ ನೌಕರರ ಕುಟುಂಬ ಸದಸ್ಯರೂ ಕೂಡ ಈ ಧರಣಿಯಲ್ಲಿ ನಿರತರಾಗಿದ್ದು ಸರ್ಕಾರ ಮತ್ತು ಸಾರಿಗೆ ನಿಗಮದ ಆಡಳಿತ ಮಂಡಳಿ ಬೇಡಿಕೆಯನ್ನು ಈಡೇರಿಸಲೇಬೇಕು ಎಂದು ಒತ್ತಾಯಿಸುತ್ತಿದ್ದಾರೆ.
ಸರ್ಕಾರ 2020ರ ಡಿಸೆಂಬರ್‌ನಲ್ಲಿ ಲಿಖಿತವಾಗಿ ಕೊಟ್ಟಿರುವ ಭರವಸೆ ಈಡೇರಿಸದೆ ಮಾತು ತಪ್ಪಿದ್ದರಿಂದ ವಿಧಿ ಇಲ್ಲದೆ 2021ರ ಏಪ್ರಿಲ್‌ನಲ್ಲಿ ಮುಷ್ಕರ ಮಾಡಬೇಕಾಯಿತು. ಮತ್ತೆ ಅದೇ ರೀತಿ ಈವರೆಗೂ ಸರ್ಕಾರ ಉದಾಸೀನತೆಯಿಂದ ಜವಾಬ್ದಾರಿ ಮರೆತು ನೌಕರರ ವಿಷಯದಲ್ಲಿ ನಡೆದುಕೊಳ್ಳುತ್ತಿದೆ. ಈಗಲಾದರೂ ನಮ್ಮ ಬೇಡಿಕೆಗೆ ಸ್ಪಂದಿಸಬೇಕು ಎಂದು ಧರಣಿ ನಿರತರು ಆಗ್ರಹಿಸಿ ಧರಣಿ ಮುಂದುವರಿಸುತ್ತಿದ್ದಾರೆ.
