ಶ್ರೀರಂಗಪಟ್ಟಣ: ಗೂಡ್ಸ್‌ ಆಟೋ ಮತ್ತು ಬೈಕ್ ನಡುವೆ ನಡೆದ ಭೀಕರ ರಸ್ತೆ ಅಪಘಾತದಲ್ಲಿ ಬೈಕ್ ಸವಾರರಿಬ್ಬರು ಗಂಭೀರವಾಗಿ ಗಾಯಗೊಂಡ ಘಟನೆ ಅರಕೆರೆ – ಬಳ್ಳೇಕೆರೆ ಮಾರ್ಗ ಮಧ್ಯದ ಕೆರೆಬಳಿ ನಡೆದಿದೆ.
ನೇರಲೇಕೆರೆಯ ನಿವಾಸಿ ವಕೀಲರಾದ ಮಹದೇವ (4) ಮತ್ತು ಹಿಂಬದಿ ಸವಾರ ಬಳ್ಳೇಕೆರೆಯ ನಿವಾಸಿ ಕೃಷ್ಣೇಗೌಡ ಗಾಯಗೊಂಡವರು. ಅವರಲ್ಲಿ ಮಹದೇವ ಅವರ ಕೈ, ಕಾಲು ಮತ್ತು ಮುಖಕ್ಕೆ ತೀವ್ರ ಪೆಟ್ಟುಬಿದ್ದು ಮಂಡ್ಯ ಜಿಲ್ಲಾಸ್ಪತ್ರೆಯಲ್ಲಿ ಪ್ರಥಮ ಚಿಕಿತ್ಸೆ ಪಡೆದು ಹೆಚ್ಚಿನ ಚಿಕಿತ್ಸೆಗಾಗಿ ಸ್ಪಂದನಾ ಆಸ್ಪತ್ರೆಯಲ್ಲಿ ದಾಖಲಿಸಲಾಯಿತು.
ಹಿಂಬದಿ ಸವಾರ ಕೃಷ್ಣೇಗೌಡ ಅವರಿಗೆ ಸಣ್ಣಪುಟ್ಟಗಾಯಗಳಾಗಿದ್ದು, ಜಿಲ್ಲಾಸ್ಪತ್ರೆಯಲ್ಲಿ ಚಿಕಿತ್ಸೆಗೆ ದಾಖಲಿಸಲಾಗಿತ್ತು.
ಘಟನೆ ವಿವರ: ಕಳೆದ ಇದೇ ಜ.10ರಂದು ರಾತ್ರಿ 9ಗಂಟೆ ಸುಮಾರಿಗೆ ಶ್ರೀರಂಗಪಟ್ಟದಲ್ಲಿರುವ ತಮ್ಮ ವಕೀಲರ ಕಚೇರಿಯಲ್ಲಿ ಮಹದೇವ ಅವರು ಕೆಲಸ ಮುಗಿಸಿಕೊಂಡು ನೇರಲೇಕೆರೆಗೆ ಕೃಷ್ಣೇಗೌಡ ಅವರ ಜತೆ ಬರುತ್ತಿದ್ದಾಗ ಬಳ್ಳೇಕೆರೆ ಕಡೆಯಿಂದ ವೇಗವಾಗಿ ಬಂದ ಗೂಡ್ಸ್‌ ಆಟೋ ಅರಕೆರೆ ಕಡೆಯಿಂದ ಬರುತ್ತಿದ್ದ ಬೈಕ್‌ಗೆ ಡಿಕ್ಕಿ ಹೊಡೆದಿದೆ.
ಡಿಕ್ಕಿ ಹೊಡೆದ ರಭಸಕ್ಕೆ ಬೈಕ್ ಮುಂದಿನ ಚಕ್ರ ಒಂದು ಸುತ್ತು ತಿರುಗಿದೆ. ಗೂಡ್ಸ್‌ ಆಟೋದ ಮುಂದಿನ ಗಾಜು ಜಖಂಗೊಂಡಿದೆ. ಈ ವೇಳೆ ಮಹದೇವರಿಗೆ ತೀವ್ರ ಗಾಯವಾಗಿದ್ದು ತೀವ್ರ ರಕ್ತಸ್ರಾವವಾಗಿ ಜ್ಞಾನತಪ್ಪಿ ಅಪಘಾತ ಸ್ಥಳದಲ್ಲೆ ಬಿದ್ದಿದ್ದರು. ಆ ವೇಳೆ ಅದೇ ಮಾರ್ಗವಾಗಿ ಬಂದ ಸಾರ್ವಜನಿಕರು ಆಂಬುಲೆನ್ಸ್‌ಗೆ ಕರೆ ಮಾಡಿ ಆಂಬುಲೆನ್ಸ್‌ ಮೂಲಕ ಮಂಡ್ಯ ಜಿಲ್ಲಾಸ್ಪತ್ರೆಗೆ ದಾಖಲಿಸಿದ್ದರು.
ಈ ಸಂಬಂಧ ಅರಕೆರೆ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಮುಂದಿನ ಕ್ರಮ ಜರುಗಿಸುತ್ತಿದ್ದಾರೆ.
