ಬೆಂಗಳೂರು: ಅಖಿಲ ಭಾರತ ಮಾನವ ಹಕ್ಕುಗಳು, ಉದಾರವಾದ ಹಾಗೂ ಸಾಮಾಜಿಕ ನ್ಯಾಯ ಮಂಡಳಿಯ ರಾಷ್ಟ್ರೀಯ ಅಧ್ಯಕ್ಷ ಡಾ. ಸತೀಶ್‌ ಚಂದ್ರ ಅವರು ಆಮ್‌ ಆದ್ಮಿ ಪಾರ್ಟಿ ಬೆಂಗಳೂರು ಅಧ್ಯಕ್ಷ ಮೋಹನ್‌ ದಾಸರಿ ಸಮ್ಮುಖದಲ್ಲಿ ಪಕ್ಷಕ್ಕೆ ಸೇರ್ಪಡೆಯಾದರು.
ನಗರದ ಪ್ರೆಸ್‌ಕ್ಲಬ್‌ನಲ್ಲಿ ಇಂದು ಆಯೋಜಿಸಿದ್ದ ಪಕ್ಷ ಸೇರ್ಪಡೆ ಕಾರ್ಯಕ್ರಮದಲ್ಲಿ ಮಾತನಾಡಿನ ಮೋಹನ್‌ ದಾಸರಿ, “ಸುಮನ್‌ ಚಾರಿಟಿ ಫೌಂಡೇಷನ್‌ನ ವ್ಯವಸ್ಥಾಪಕ ಟ್ರಸ್ಟಿ ಕೂಡ ಆಗಿರುವ ಡಾ. ಸತೀಶ್‌ ಚಂದ್ರ ಅರು ಅನೇಕ ಬಡವರಿಗೆ ಉಚಿತ ವೈದ್ಯಕೀಯ ಚಿಕಿತ್ಸೆ ನೀಡಿದ್ದಾರೆ. ಬೆಗ್ಗರ್ಸ್‌ ಕಾಲೋನಿಯ ಸಮೀಕ್ಷೆ ನಡೆಸಿದ್ದರು. ಬೆಗ್ಗರ್ಸ್‌ ಕಾಲೋನಿಯ 126 ಎಕರೆ ಜಾಗವನ್ನು ಬಿಡಿಎ ವಾಪಸ್‌ ನೀಡಬೇಕೆಂದು ಹೈಕೋರ್ಟ್‌ ಆದೇಶ ನೀಡಿದ್ದರ ಹಿಂದೆ ಇವರ ಸಮೀಕ್ಷಾ ವರದಿ ಮಹತ್ವದ ಪಾತ್ರ ವಹಿಸಿದೆ ಎಂದು ಪರಿಚಯ ಮಾಡಿದರು.
ಮಾನವ ಹಕ್ಕುಗಳ ಹೋರಾಟಗಾರರಾಗಿ ಗುರುತಿಸಿಕೊಂಡಿರುವ ಡಾ. ಸತೀಶ್‌ ಚಂದ್ರ ಅವರು ಹತ್ತು ವರ್ಷಗಳಿಂದ ಜೈಲಿನಲ್ಲಿರುವ, 65 ವರ್ಷಕ್ಕಿಂತ ಹೆಚ್ಚು ವಯಸ್ಸಾಗಿರುವ ಹಾಗೂ ರೋಗಗಳಿಂದ ಬಳಲುತ್ತಿರುವ ಖೈದಿಗಳನ್ನು ಬಿಡುಗಡೆ ಮಾಡಬೇಕೆಂದು ಸರ್ಕಾರದ ಮೇಲೆ ಒತ್ತಡ ಹೇರಿದ ಅನುಭವ ಹೊಂದಿದ್ದಾರೆ. ಜೈಲಿನೊಳಗೆ ಸಣ್ಣ ಕೈಗಾರಿಕೆಗಳು ಆರಂಭವಾಗಿರುವುದರ ಹಿಂದೆ ಇವರ ನಿರಂತರ ಹೋರಾಟವಿದೆ. ಅಣ್ಣಾ ಹಜಾರೆಯವರ ಭ್ರಷ್ಟಾಚಾರ ವಿರೋಧಿ ಜನಾಂದೋಲನದ ಸಂದರ್ಭದಲ್ಲಿ ದೆಹಲಿಗೆ ತೆರಳಿ ಹೋರಾಟವನ್ನು ಬೆಂಬಲಿಸಿದ್ದರುಎಂದು ಮೋಹನ್‌ ದಾಸರಿ ಹೇಳಿದರು.
ಆಮ್‌ ಆದ್ಮಿ ಪಾರ್ಟಿ ಸೇರಿ ಮಾತನಾಡಿದ ಡಾ. ಸತೀಶ್‌ ಚಂದ್ರ, “ಭಾರತವು ನಾನಾ ರೀತಿಯ ರಾಜಕೀಯ ಪಕ್ಷಗಳನ್ನು ಕಂಡಿದೆ. ಆದರೆ ಆಮ್‌ ಆದ್ಮಿ ಪಾರ್ಟಿಯು ಅವೆಲ್ಲಕ್ಕಿಂತ ಭಿನ್ನವಾದ ಸಿದ್ಧಾಂತ ಹೊಂದಿದ್ದು, ಜನಸಾಮಾನ್ಯರ ಹಿತ ಹಾಗೂ ಪಾರದರ್ಶಕ ಆಡಳಿತದಲ್ಲಿ ನಿಜವಾದ ಬದ್ಧತೆ ಹೊಂದಿದೆ. ದೆಹಲಿ ಸಿಎಂ ಅರವಿಂದ್‌ ಕೇಜ್ರಿವಾಲ್‌ ನೇತೃತ್ವದ ಸರ್ಕಾರವು ಶಿಕ್ಷಣ, ಆರೋಗ್ಯ, ಮೂಲಸೌಕರ್ಯ ಕ್ಷೇತ್ರದಲ್ಲಿ ಅಸಾಮಾನ್ಯ ಸುಧಾರಣೆಗಳನ್ನು ತಂದಿದೆ ಎಂದರು.
ಇದಿಷ್ಟೇ ಅಲ್ಲದೆ ದೆಹಲಿಯ ಸರ್ಕಾರಿ ಶಾಲೆಗಳಲ್ಲಿ ವಿಶ್ವದರ್ಜೆಯ ಮೂಲಸೌಕರ್ಯಗಳನ್ನು ಕಲ್ಪಿಸಿರುವುದು, 500ಕ್ಕೂ ಹೆಚ್ಚು ಮೊಹಲ್ಲಾ ಕ್ಲಿನಿಕ್‌ಗಳನ್ನು ವ್ಯವಸ್ಥಿತವಾಗಿ ತೆರೆದಿರುವುದು ನಿಜಕ್ಕೂ ಕ್ರಾಂತಿಕಾರಿ ಬದಲಾವಣೆಗಳು. ಬೇರ್ಯಾವ ಪಕ್ಷಗಳಿಂದಲೂ ಇವುಗಳನ್ನು ನಿರೀಕ್ಷಿಸಲು ಸಾಧ್ಯವಿಲ್ಲ. ಆದ್ದರಿಂದ ಕರ್ನಾಟಕದಲ್ಲೂ ಎಎಪಿಯನ್ನು ಅಧಿಕಾರಕ್ಕೆ ತರಲು ಶ್ರಮಿಸಬೇಕು ಎಂಬ ಉದ್ದೇಶದಿಂದ ಪಕ್ಷಕ್ಕೆ ಸೇರ್ಪಡೆಯಾಗಿದ್ದೇನೆ ಎಂದು ಹೇಳಿದರು.
[wp-rss-aggregator limit=”4″ pagination=”on”]
