ವಿಜಯಪಥ ಸಮಗ್ರ ಸುದ್ದಿ
ಬೆಂಗಳೂರು: ರಾಜ್ಯದಲ್ಲಿ ಕೋವಿಡ್ ಎರಡನೇ ಅಲೆ ಅತಿ ವೇಗದಲ್ಲಿ ಹರಡುತ್ತಿದ್ದು, ಈ ರೀತಿಯಲ್ಲಿ ಉಲ್ಬಣಾವಸ್ಥೆಗೆ ತಲುಪಲು ಆಡಳಿತ ಪಕ್ಷ ಬಿಜೆಪಿ ಹಾಗೂ ಕಾಂಗ್ರೆಸ್, ಜೆಡಿಎಸ್ ವಿಪಕ್ಷಗಗಳೇ ನೇರ ಹೊಣೆ ಎಂದು ಆಮ್ ಆದ್ಮಿ ಪಕ್ಷದ ರಾಜ್ಯ ಮಾಧ್ಯಮ ಸಂಚಾಲಕ ಜಗದೀಶ್ ವಿ. ಸದ೦ ಕಿಡಿ ಕಾರಿದರು.
ಬುಧವಾರ ನಗರದ ಎಎಪಿ ಕಚೇರಿಯಲ್ಲಿ ಆಯೋಜಿಸಿದ್ದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಆಪರೇಷನ್ ಕಮಲದಿಂದ ತೆರವಾಗಿದ್ದ ಮಸ್ಕಿ , ಬಸವಕಲ್ಯಾಣ ಹಾಗೂ ಸಿಂದಗಿ , ಬೆಳಗಾಂ ಲೋಕಸಭಾ ಉಪ ಚುನಾವಣೆಗಳನ್ನು ಕಳೆದ 1ತಿಂಗಳಿನಿಂದ ಅತ್ಯಂತ ಪ್ರತಿಷ್ಠೆಯ ವಿಷಯವನ್ನಾಗಿ ತೆಗೆದುಕೊಂಡಿರುವ ಈ ಎಲ್ಲ ಪಕ್ಷಗಳ ಪ್ರಮುಖ ನಾಯಕರು ಒಬ್ಬರಿಗೊಬ್ಬರು ಕೆಸರೆರೆಚಿಕೊಂಡು ಅಬ್ಬರದ ಪ್ರಚಾರ ಕಾರ್ಯದಲ್ಲಿ ತೊಡಗಿದ್ದರು. ಇವರ ಈ ಬೇಜವಬ್ದಾರಿ ನಡೆಯಿಂದಲೇ ರಾಜ್ಯದಲ್ಲಿ ಈಗ ಈ ರೀತಿಯ ಕೋವಿಡ್ ಎರಡನೇ ಅಲೆಯ ದುಸ್ಥಿತಿಗೆ ನೇರ ಕಾರಣ ವಾಗಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ತಜ್ಞರ ಸಮಿತಿಯು ಹಲವಾರು ವರದಿಗಳನ್ನು ನೀಡಿದರೂ ಸಹ ರಾಜ್ಯವು ಮುಂದೆ ಎದುರಿಸಬೇಕಾಗಿದ್ದ ಕೋವಿಡ್ ಮಹಾಮಾರಿಯ ಆರೋಗ್ಯ ತುರ್ತು ಪರಿಸ್ಥಿತಿಯನ್ನು ಸರ್ಕಾರದ ಮಂತ್ರಿಗಳು ಹಾಗೂ ವಿರೋಧ ಪಕ್ಷದ ಯಾವ ಪ್ರಮುಖ ನಾಯಕರುಗಳು ಅಂದಾಜಿ ಸಲಿಲ್ಲ. ಮುಂಜಾಗ್ರತಾ ಕ್ರಮಗಳ ಬಗ್ಗೆ ಮಾರ್ಚ್ ನಲ್ಲಿ ನಡೆದ ಎರಡೂ ಸದನಗಳ ಅಧಿವೇಶನದಲ್ಲಿ ಸಹ ಚರ್ಚಿಸದೆ ಸದನದ ಸಮಯವನ್ನು ಹಾಳುಗೆಡವುದರಲ್ಲಿ ನಿರತರಾಗಿದ್ದರು.
ಮುಖ್ಯಮಂತ್ರಿ ಯಡಿಯೂರಪ್ಪ ತಮ್ಮ ಕುರ್ಚಿಯನ್ನು ಭದ್ರಪಡಿಸಿಕೊಳ್ಳಲು ಒಂದು ಹೆಜ್ಜೆ ಮುಂದೆ ಹೋಗಿ ಉಪ ಚುನಾವಣೆಯಲ್ಲಿ ಗೆಲುವು ಸಾಧಿಸಿ ತೋರಿಸುವುದೇ ನಮ್ಮ ಗುರಿ ಎಂಬಂತೆ ಮಾತನಾಡಿದರು. ಮೂರೂ ಪಕ್ಷಗಳ ಯಾವ ಶಾಸಕರು ಸಹ ಮುಂದಾಗಬಹುದಾದ ಕೋವಿಡ್ ಎರಡನೇ ಅಲೆಯ ಅನಾಹುತಗಳ ಮುಂಜಾಗ್ರತಾ ಕ್ರಮದ ಬಗ್ಗೆ ಚರ್ಚಿಸಲೇ ಇಲ್ಲ ಎಂದು ಅಸಮಾಧಾನ ಹೊರಹಾಕಿದರು.
ಇನ್ನು ಆರೋಗ್ಯ ಸಚಿವ ಸುಧಾಕರ್ ವ್ಯತಿರಿಕ್ತವಾಗಿ ಈ ಎಲ್ಲ ದುರವಸ್ಥೆಗೆ ರಾಜ್ಯದ ಜನತೆಯೇ ಕಾರಣ ಎಂದು ಆಪಾದಿಸುತ್ತಿದ್ದಾರೆ. ಸಚಿವರ ಬೇಜವಾಬ್ದಾರಿ ಹೇಳಿಕೆಯನ್ನು ಕಟುಮಾತುಗಳಿಂದ ಆಮ್ ಆದ್ಮಿ ಪಕ್ಷ ಖಂಡಿಸುತ್ತದೆ ಎಂದರು.
ಇದೀಗ ಸರ್ವಪಕ್ಷಗಳ ಸಭೆ ಹಾಗೂ ರಾಜ್ಯಪಾಲರ ಮುಂದೆ ಒಬ್ಬರಿಗೊಬ್ಬರು ಕೆಸರೆರೆಚಿಕೊಂಡು ರಾಜ್ಯದ ಜನತೆಯನ್ನು ಮೂರ್ಖರನ್ನಾಗಿಸುತ್ತಿದ್ದಾರೆ. ಬೆಡ್, ಆಕ್ಸಿಜನ್, ಐಸಿಯು ಗಳು ಸಿಗದೆ ರಾಜ್ಯದಲ್ಲಿ ಅದರಲ್ಲೂ ಬೆಂಗಳೂರಿನಲ್ಲಿ ಧಾರುಣವಾಗಿ ಸಾವನ್ನಪ್ಪುತ್ತಿರುವ ಜನಸಾಮಾನ್ಯರು ಅಕ್ಷರಶಃ ಸರ್ಕಾರಿ ಪ್ರಾಯೋಜಿತ ಕೊಲೆಗೀಡಾಗುತ್ತಿದ್ದಾರೆ ಎಂದು ಸದ೦ ಆರೋಪಿಸಿದರು.
ಪಕ್ಷದ ಮುಖಂಡೆ ಶ್ರುತಿ ಪಿ.ಎಂ. ಕಾವೇರಿಪುರ ಭಾಗವಹಿಸಿದ್ದರು.
